На секој трет жител на Истокот му барале или дал мито за услуга или за завршување на некоја работа во државна институција. Ова се податоци од истражување направено од страна на МЦМС според кои дури половина милион жители од државата имаат некакво искуство со мито.

Корупцијата е толку вкоренета, што дури 35 % од младите помеѓу 18 и 29 години корупцијата ја прифаќаат како нормална појава.

Иако присуството на корупција е речиси јавно и очигледно, сепак, одвај 0,03 % од нив се откриени и завршиле со судска пресуда.

Ова , од една страна, е резултат на фактот што дури 89 % од оние на кои им било побарано мито тоа никаде не го пријавиле. Од друга страна,  е недовербата во судскиот систем, кој покрај здравството и царината, според анкетираните е високо на  листата на институции каде има корупција:

• Особено загрижува доколку има корупција во судството , зашто тоа е орган кој треба да се бори против корупцијата во сите други институции, истакна Рената Дескоска, министер за правда.

Во обид да ја намали корупцијата, државата најавува нова вид на комисија која ќе се бори против сите облици на митаџиство:

• Идејата е новата комисија да биде составена од експерти, луѓе коишто немаат политичка афилијација, а тоа го сметаме за некој вид предност – знаењето, но и политичката неврзаност како предност во смисла на исполнувањето на овие задачи коишто оваа антикорупциска комисија треба да ги има. Во рамки на оваа работна група покрај моделот на антикорупциска комисија, се разгледуваат и надлежностите на овој орган бидејќи ефективни надлежности но и јасни законски норми ќе бидат секако придонес кон подобро вршење на активностите на овој орган во рамките на своите надлежности, потенцираше Дескоска.

Колку сево ова ќе помогне, е прашање, зашто ланецот на корупција силно го држат и оние што бараат, но и оние што даваат. Раката што дава не само што не се сече, туку и побрзо и поефикасно завршува работа.