(Видео+Фото) Берово и Врање градат мостови на пријателство преку фудбалот

декември 08 21:01 2024 од Senad Rasimov

Гости од српскиот град Врање, вчера во салата „Македонски бранители“ во Берово, одиграа пријателски фудбалски натпревар, со вљубеници на фудбалот од Берово, кои заеднички испишуваат позитивна приказна за пријателство и дружба која нема граници.

Околу 15 младинци од градот Врање, поврзани со фудбалот од кои неколку сеуште играат и тренираат, беа топло пречекани во нашиот град од нивните пријатели Беровчани, кои покажаа дека преку спортот се созадваат нераскинливи врски помеѓу двата града Берово и Врање.

-Се започна со нашето пријателство со Игор Сасански, од кое настана оваа пријателство помеѓу двата града Врање и Берово. Првата средба ја имавме оваа година во Врање, мислам дека беше во мај месец и сакаме понатаму да продолжиме да го градиме нашето пријателство. Секако не само да биде пријателство помеѓу нас другарите, туку целта ни е оваа пријателство да биде помеѓу двата града Врање и Берово. Ние сме овде во Берово прв пат и сакаме оваа традиција да ја продолжиме преку пријателство, другарство и двата градови. Нашето пријателство со Игор постои веќе 10 години, преку спортот и фудбалот имавме идеја да одиграме натпревар во Врање, тоа се случи и еве сега и овде ја реализираме оваа идеја. Целата наша екипа се бавиме со спорт и преку спорто сме ние тука сите пријатели. Јас и понатаму се занимавам со фудбал во понизок ранг, а од моите другари некои повеќе не играат, некои сеуште се тренери Се надевам дека повторно ќе се видиме и дружиме следната години, поточно не се надевам туку сум сигурен дека ќе се случи тоа – истакна Иван Стојковиќ.

Топлиот пречек на Беровчани во српкиот град Врање, беше повод да се покажат како добри домаќини на домашен терен и преку спортот да се заокружи позитивната слика на пријателство кое го градат и распространуваат овие младинци.

-Неколку пати ја одложувавме оваа средна, но денеска еве гостите успеаја да дојдат. Бевме топло пречекани од нашите пријатели пред неколку месеци, па сакаме во најмала мера да им возвратиме и ние тука, преку организација на овој ревиален натпревар една утакмица, а друга утакмица имаме вечерва во ресторанот „Мрс“. Се надеваме дека ќе биде фер и на двете утакмици и подобриот нека победи, со среќа на двете екипи. Во иднина имаме надеж да што повеќе вакви братски средби помеѓу нашите два градови – рече Дамјан Аврамски.

По интонирањето на двете химни на Република Македонија и Република Србија, беше одигран фудбалски натпревар, со краен резултат 7:4 загостинската екипа од Врање.

Освен фудбалскиот натпревар, гостите имаа можност да го запознаат нашиот град, а вечерта беше организирана средба на дружење во ресторанот „Мрс“ каде пријателите од српскиот град Врање, во една преубава дружба и убава атмосфера, со трпеза од традиционалните малешевски специјалитети, придружени со македонски и српски песни во живо, ги прославија убавите моменти кои заеднички ги градат овие млади ентузијасти.

Овој чин на пријателство е пример дека спортот нема граници и дека преку спортот се градат мостови на пријателство кои траат вечно и создаваат позитивни приказни на секое поле.

Видео од настанот: